Apple tlahniam mah se an tluk thei lo

Apple hian iPhone an siam chhuah chu kum dang zawng aiin an hralh tlem tih sawi mah se, Forbes-in khawvela tech company lian ber ber a tarchhuahah Apple Inc. tluk pha an la awm chuang. A ṭha ngai Apple bawk hi a lian ber an la ni.

Apple hi tech company zinga sum lalut hnem ber a ni a, kum khat­ah USD tld 233 zet a lalut a, heng aṭanga a hlep zawng zawng hi USD tld 53 zet a tling. Assets leh market cap-ah pawh tuman an la tluk lo a, nikum chhunga an asset zawng zawng hlut zawng hi USD tld 239 zet a ni. Tech company zinga lian ber a nih mai bakah khawvel huap pawhin company lian pariatna a tling pha a, US-ah chuan company lian ber palina a ni.

Samsung chu tech company lian ber dawttu a ni a, he South Korean company hian kum khat chhungin USD tld 177 zet sum a lut a, a hlep hi USD tld 16.5 lai niin, a assets hlut zawng hi USD tld 206.5 ngawt a ni. Khawvel huap pawhin he company hi 18-na lai a tling phak. Microsoft chu pathumna a ni a, USD tld 86.5 a lalut a, hlep hi USD tld 10 niin an asset hi USD tld 182 a ni a, khawvel huapin company len lamah 23-na a ni.

Khawvela tech company lian ber ber 10 zinga pasarih ngawt hi US-a mi an ni a, Apple leh Microsoft bakah Alphabet, Intel, IBM, Cisco System leh Oracle te an ni. Alphabet hi Tech company len lamah palina a ni a, IBM hi pangana, Intel chu parukna, Cisco chu pasarihna, Oracle chu pariatna, Taiwanese company Hon Hai chu pakuana, Taiwan company tho Taiwan Semiconductor chu 10-na a ni.

Tech khawvelah company rawn lar thar leh hmasawn tak tak awmin, a hlun berte zinga mi Apple chu an tlahniam ti mah se, tuman Apple hi an la tluk thei chuang lo.