Artist 100-ah Jay-Z a la ropui

Billboard Artist 100 chart tih­chhuahah Billboard 200 chart-a pakhatna luahtu Jay-Z bawk a la ropui ber. Hetihlai hian Chester Bennington thihna avanga an hla leh album hralh kal thar Linkin Park chu palinaah an rawn lang thar bawk.

Jay-Z hian 4:44 album avangin pakhatna hi a luah leh a, he album hi kar liam ta chhung khan copy 87,000 lai an hralh belh leh a nih kha. Album a hralh ṭhat vang te, social media lamah thleng a album hian sawi zui leh share a hlawh avangtein billboard Artist 100-ah Jay-Z hian pakhatna a luah leh.

Ed Sheeran chu pahnihnaah bawk a awm leh a, ani hian thawm lian hluai nei tawh rih lo mah se, a music hralh a kal reng tih a lang. Bruno Mars chu pathumnaah bawk a awm leh.

Linkin Park chu an vocalist Chester Bennington a thih avangin an music hralh nasa takin a kal leh phah a, hei hian Billboard Artist 100-ah a vawrh kâng nasa hle. Linkin Park hi palinaah an rawn lang. Kendrick Lamar chu panganaah a chhuk thung.