James Hetfield-a’n Kendall leh Kylie Jenner a sawisel

Kan tarlang tawh a, Kendall leh Kylie te u­nauin t-shirt an tihchhuahah Metallica te, zaithiam hranghlui dang thlalakte an bel tih kha. Sawiselna pawh an dawng a, chuvang chuan Jenner te unau hian an t-shirt pawh an pawt kir leh a nih kha. Hetiang hnuah James Hetfield chuan an band thlalak an tarlan kha a duhzawng a nih loh thu a sawi chhuak leh.

James Hetfield chuan, “An rilru âwm tur ka’n ring chhin ang a, ‘Ka duh ang apiang kan ti thei’ tih hi a nih ka ring,” a ti. “Mite nena inzawmna ṭha leh nghet kan neih nan kum 36 zet mai rim takin, kan theih ang tawpa ṭhain kan ti a, chu kan thawhrimna chu an rawn tichhia a ni,” tiin Metallica merchandise-in a tuar phah thu a sawi.

Jenner-te unau hian Metallica mai bakah Notorious B.I.G. te, Tupac Shakur te leh midang dang thlalak chu an t-shirt siam thar hmaah an chuantir a, USD 125-in an hralh. Sawiselna a nasat avang leh, Notorius B.I.G.-a chhungte phei chuan court-ah hial kalpui thu an sawi chhuah takah chuan an titawp ta a nih kha.