MDM-in Lunglei-ah District Hqrs. hawng dawn

Music Domain Mizoram chuan vawiin chawhnu dar 3-ah hian Lunglei-ah District Headquarters an hawng dawn a, Lungleia MDM Office Bearers turte puanzarna an nei nghal dawn bawk.

MDM District Head-quarters Lunglei hawn lawmna pual hian zan dar 7-ah Saikuti Hall-ah free concert an nei nghal dawn a, he hunah hian MDM artist lar tak tak- Sawmtea Chhangte, Manuna Chuaungo, Feli Fanai, Zorinzuali, Marina Varte, Lalhmangaihzuali (Nunu-i) leh Vanlalduhawma (Kawrthindenga)-te chu Aizawl aṭangin an kal anga, anni bakah hian Lunglei zaithiam tak takte an inlan dawn bawk a ni.

MDM Information & Publicity Cell chuan thuchhuah an siamah,"He hun atan hian MDM General Headquarters hruaitute chuan bengsika ngaihtuahin thlutlukna fel tak an siam a. Zaithiamte'n hamṭhatna hei aia nasa zawk an hmuh chhoh zelna tûra hmalak zel hi an tum bulpui ber a ni bawk. Mizoramah zaithiamte platform hei aia phuisui leh changkang zawka buatsaih zel an tum a. MDM Award pawh a hma aia ṭha zawka buatsaih chhoh zel an tum bawk a ni," tiin an tarlang.