Ni khat thil thuah Bill Gates lehpelin Jeff Bezos a hausa ber!
Forbes-in hausa list a tihchhuahah Bill Gates a hausa ber a, mahse Ningani aṭang khan Amazon CEO, Jeff Bezos chuan Bill Gates a rawn khum. Stock market lama a dinhmun ṭhat vang a ni ber ang chu.
Nilainia stock market hun tawp lamah khan Amazon CEO, Jeff Bezos hausakna hi USD tld 89-ah a chho a, Bill Gates hi USD tld 90 a ni. Ningani kha chuan Jeff Bezos hian Bill Gates hi a rawn khum ta a ni. Amazon share pakhat hi USD 15 zela hluah a kai chho a, chutihlai chuan Microsoft share dinhmun a tlahniam a, chu chu Bezos hian a hlawkpui.
Kum 22 kaltaa a garage aṭanga lehkhabu hralh aṭanga hlawhtling chho Jeff Bezos hi stock market-ah a dinhmun aṭhat chhoh zel chuan Bill Gates hi a khum thei zel dawn nia sawi a ni. Kum 30 kalta aṭanga hausa list tihchhuah tirh aṭanga hausa ber ni thei parukna a ni.
Jeff Bezos hi kum 1998 aṭang khan Forbes-in hausa list a tihchhuahah a lo lang ṭan tawh a, hemi kum hian a hausakna hi USD tld 1.6 a ni. Kum 2007 khan a hausakna chu USD tld 4.4 a tling chho tawh a, kum 2012 khan 16-na ni pha tawhin, a hausakna pawh USD tld 18.4 zet a ni tawh.
Tun kum hnih vel kalta aṭang khan Amazon stock chu nasa takin a hlu chho a, hei hian Bezos hausakna pawh a belh nasa hle. Amazon-a share zaa 17 lai hi a ta a ni a, share maktaduai 79.9 zet a nei. Kum nga kalta aṭang khan a hausakna hi USD tld 70 zetah a pun belh a ni.
Khawvela hausa ber ṭhin Bill Gates hi an khum hlei thei lo ṭhin a, Jeff Bezos pawh hian engtia rei nge a khûm theih ang tih a hriat loh. Kum 23 chhung khan Bill Gates hi hausa berah
ṭum 18 a awm tawh a, amah rawn khûmtu an awm leh zawk ṭhin a, Mexico-a mi Carlos Slim chuan kum 2010 leh 2012 te khan a lo lehpel tawh a, kum 2008 khan Warren Buffett chu hausa berah a lo lang ve zawk tawh bawk.