Ni tin WhatsApp hmangtu tld 1 tling

WhatsApp chu a lar zel a, tunah chuan ni tin he app hmangtu hi tluklehdingawn khat an tling ta hial mai. WhatsApp neitu Facebook company chuan WhatsApp hmangtu zat leh he app hmasawn dan hi a tarlang a, ni tin, active user tluklehdingawn khat an tling.

Snapchat tihdan an hriat aṭanga an siam, WhatsApp Status pawh tunah chuan active user hi ni tin mi maktaduai 250 lai an awm tawh a, Snapchat ai mahin Status hmangtu an tam tawh zawk. Hei mai bakah hian ni tin message tluklehdingawn 55 zet chu share a ni ṭhin; WhatsApp hian tunah hian ṭawng chi hrang hrang 60 lai a support tawh a ni.

Hma a sawn nasa tawh hle a, kum 2014 khan thla tin active user maktaduai 450 chauh an awm a, kum 2014 khan he app hi Facebook chuan a lei a, a lei lai hian USD tld 19 a ni.

WhatsApp status hi kumin kum tir lama hman theih ṭan kha a ni a, khata ṭanga thla ruk a kal meuh chuan ni tin Status hmangtu hi maktaduai 250 lai an tling tawh. Status hi Snapchat aṭanga an entawn a ni a, Snapchat a luah lan ta zawk hle a, Snapchat-ah chuan Status hmangtu hi ni tin maktaduai 166 chauh a ni thung.