K-Pop Contest grand finale-ah Mizo pakhatna Immortals Army an thiam ber
K-Pop Contest-a ram tina pakhatna hi K-Pop World Festival, South Korea-a neih turah India ram aiawhin an inlan dawn a, a hmain India ram aiawh hian Mizo dance crew, Frozen Crew an lo chhuak tawh a, tunah Immortals Army an inlan ve leh dawn a ni.
India pum huap K-Pop Contest 2017 hi July 29 khan Delhi-ah Grand Finale neih a ni a, hetah hian Champhai lam chhuak dance crew, Immortals Army chu tuma tluk loh an ni a, Lalngaihsangi chu vocal category-ah pahnihna a ni bawk. Anni hi South Korea-ah a thlawna an zin theih dawn mai bakah Immortals Army te hi khawvel huapa K-Pop intihsiakah India ram ai an awh ang.
K-Pop Contest hi khawvel hmun hrang hrangah kum tin neih ṭhin a ni a, Mizoramah erawh chuan kum 2015 aṭang khan kan hmelhriatṭan. India-a region hrang hrangah regional round neih ṭhin a ni a, Mizoram pawh North-East region-ah kan tel ve ṭhin a, amaherawhchu kumin aṭang hian Mizoram Kpop Fan club hmalakna zarah North-East region-a tel tawh loin Mizoram region hrang hlakin kalpui a ni. He contest hi online audition-a ṭan a ni a, Mizoram region-ah hian Dance leh Vocal category-ah video 40 chuang lutin chung zinga a ṭha zual Dance category-ah team paruk leh vocal category-ah team pariattechuan July 1, 2017 khan Vanapa Hall-ah an intihsiak a, Immortal Army leh Lalngaihsangi te hi Mizoram aiawh tura thlan chhuahte an ni.
India-a grand finale-ah hian India-a region 11 aṭangin a ṭha ber ber thlan chhuah, Dance leh Vocal-a pakhatnate hi an intihsiak leh a ni.