'Zurui Ṭawngṭaina' hla dance version tichhuak

Andrew Laltlankima hla thar ‘Zu rui ṭawngṭaina’ chu a lyric video tihchhuah a ni tawh a, chumi hnuah Mizo Dance Camp chuan dance version hi buaipuiin an tichhuak.

Mizo Dance Camp tena ‘Zu rui ṭawngṭaina’ dance version an siamah hian lâm ngawr ngawr a ni ringawt lo a, thawnthu nei, concept video a ni a, hei hian a tihmuhnawm. Tunlai ṭhalaite khawvel nena inmil takin ‘Zu rui ṭawngṭaina’ dance version hi siam a ni a, hnuk tiulh thei, ngaihtuahna thui taka hruai thei video a ni. He hla phuaha satu Andrew chuan, video kaltlang hian mahni nun kawng ṭheuha harsatna hrang hrang tawk ten Pathianah chauh hlimna tluantling a awm tih hre nawn fo se a duh.

Video-a main character hi Zuala Hmar niin, female lead hi Chhandami a ni. Character langsar dang te chu Steve Lal­ruatkima, Zuala Renthlei, Regina Chawngthu, Priscilla Vangchhawng, Ca­therine Hlawnmual, Isak Chhakchhuak, Nicholas Rinawma, Mapuia leh Mark Lalnuntluanga te an ni. Video hi Chopstyx Restaurant leh St. Mary’s Church, Electric Vengah te shoot a ni a, an chungah MDC chu an lawm hle.

Zu rui Ṭawngṭaina dance video hi Alan Rinawma direct leh choreograph a ni a, Youtube-a ama channel-ah en theiha dah chhuah a ni. A hmaa dance video an lo upload Despacito chuan chawlhkar ruk chhungin entu maktaduai 2 chuang a kai chho leh a, lo en a, lo share-tute chungah MDC chuan lawmthu a sawi.