Mizo Idol Zaninah Top 10 kan hre thei tawh dawn e.

Ningani zan leh nizan lamah khan Mizo Idol top 20-te chuan intihsiakna an bei leh a, chumi result chu zanin hian puan a ni tawh dawn.

Mizo Idol season 7 boruak a hot chhoa, mipui lam pawhin kan ngaihven zual chho hle tih a hriat. Zanin aṭang phei chuan mi 400 chuang zinga a ṭha zual thlan chhuah 10 chiah intihsiak tur an awm tawh dawn a ni. Zonet Zawlbuk leh Empai-ah zan dar 8-ah LIVE-in result puanna hi an nei dawn a, contestant 20 zinga a zahve hlawk an tla dawn a, a la tling 10-te chu August 30 aṭangin an intihsiak leh ang.

Ningani zan khan mi 10 an zai a, nizan lamah khan 10 dangte chu zai lehin an zai thiam hlawmzia hretu chu mipuite kan ni. Intihsiakte an zai thiam tawh bawk nen, judge-te comment hrang hrang thlirin fing thiam leh 'originality' nei ṭha an duh tih a hriat a, intihsiakna la chhunzawm turte pawhin chu chu an thinlung phekah an vawn tlat a ṭul tawh dawn tih a chiang.

Hla thlan thiam leh mahni aw mil tur hla zawn fuh chu thil pawimawh tak tur a ni tawh dawn. Top 10-a la tlingte hi zan hnih an intihsiak leh dawn a, August 30, 2022 Thawhlehni zan leh September 1, Ningani zanah an intihsiak leh dawn a ni. Chutah chuan track nen bawk an zai leh dawn a, Top 10 aṭang hi chuan Dawrpui Multipurpose Hall-ah intihsiakna an nei tawh ang. Dawpui Multipurpose Hall-ah hian final thlengin intihsiakna an nei tawh dawn bawk a ni.