Shia LaBeouf: Catholic-ah a inlet

"Ka indah pawimawhna chu Pathianin a lama min pawhhnaihna atan a hmang tih ka hria. Khawvel châkna lak ata min pawt hrang a ni" - Shia LaBeouf

Shia LaBeouf chuan Catholicism-ah a inlet tih sawi chhuakin, a film channa tur 'Padre Pio' chungchang avanga Catholic a zirchian hnuah a inpe ta tih a sawi.

Word on Fire Catholic Ministries Bishop Robert Barron nen an inkawmna Ningania tihchhuahah hemi chungchang hi a sawi chhuak a, kum 36 mi 'Transformer' star chuan harsatna hrang hrang a paltlang chungchangate pawh he interview-ah hian a sawi chhuak.

LaBeouf chuan 'Padre Pio'-a chang tura tih a nih hma hian rilru lamah harsatna nasa tak a tawk tih sawiin, mahni intihhlum hial a tum hman tih a sawi bawk. Mahse, Saint Padre Pio lem a chan dawn avangin Franciscan Capuchin monastery-ah Pio nungchang zirchiangin a awm a, chutah chuan Catholic Kohhran nen chuan inzawmna thuk tak neih chhunzawmin a rilru lama harsatna a tawh mek pawh paltlang turin nasa takin a pui bawk a ni.

Bishop Robert Barron bulah chuan dawhkanah silai dahin, inkah hial mai duhnate pawh a nei tih a hrilh a, mahse dam chhunzawm duhna thuk tak pawh a neih tel tho tih a hrilh bawk. Pa pakhat Jude nen Chanchinṭha bu an chhiar hnu leh kohhran chhunga group hrang hrang a zawm hnu chuan, sakhuana lam chu a ngaihtuah ta viau niin a sawi.

"Ka indah pawimawhna chu Pathianin a lama min pawhhnaihna atan a hmang tih ka hria. Khawvel châkna lak ata min pawt hrang a ni. A vai chuan a rawn thleng rual vek a, 'Ka career ka ngaihtuahna vang a ni' tih ngaihtuah lo ila chu ka car-a chuang luta, monastery lam pan turin thathona ka nei lo ang," tiin a sawi.

Pathian chuan thil ṭha zawk chhuak turin a 'trick' nia a hriat thu sawiin, chu chu hun eng emaw chen a liam hnuah chiah a hriat thiam chauh thu a sawi bawk.

LaBeouf chuan ṭawngṭaina chungchang hrefiah tur leh Kristiante'n sual an tih hrefiah tura amah ṭanpui turin mi hrang hrang a hmu tihte pawh a sawi a ni.

'Transformer' star hi kum 2020 chhoah khan a che buai hle a, midang chunga tharum thawh thubuai leh rukruk thubuaite pawh a nei hial a nih kha. Mahse monastery-a a khawsaknaah chuan tumhmaa a la neih ngai loh 'beiseina' danglam bik a chhar ta tih Bishop chu a hrilh bawk.

Shia LaBeouf-a'n a lem a chan tur 'Padre Pio' hi kum 1887 khan Francesco Forgione-ah piangin kum 81 mi niin kum 1968 khan a thi a ni. A chanchin film-a an siam hi September thla hian US-ah an tlangzarh ang.