Grande leh Bieber hla thar tur 'Stick With You'

Ariana Grande leh Justin Bieber-te chuan hla thar tihchhuah dun an tum a, an hla thar music video turah hian an fan-te chu thawhpuiah an sawm nghe nghe.

Zirtawpni liam ta khan social media-ah thuchhuah siamin Grande leh Bieber-te hian hla thar 'Stick With You' an tichhuak dawn tih an sawi a, May 8 hian tlangzarh an tum. An hla thar aṭanga an sum hmuhchhuah zawng zawng hi First Responder Children's Foundation hnenah chhawmdawlna atan an pe bawk ang.

Ariana Grande chuan heng an sum pekte hi health care worker, EMT, paramedic, police officer leh firefighter fate scholarship pekna turin hman a ni dawn tih a sawi. Chumai chu la duhtawk loin an hla thar tur instrumental version hi an post bawk a, hemi rema an lam lai video hi tweet turin an fan-te chu an ngen bawk. An prom thawmhnaw an hak theih tak loh te, an ui leh anmahni chauh emaw, nuam an tih ang bera an lamna video chu post turin an ngen a ni.

Chung video aṭangte chuan an duh thlang chhuakin an music video-ah an dahtel ang.