Amtea A hming a chuang sang leh

Hontrade Ṭhazual Fakna chart tihchhuahah hmahruaitu ngai Amtea bawk chu 'Ka hming a hria' hmangin pakhatnaah a chuang leh a, a chuanna hmun a sang rei ta hle.

Amtea hian a hla 'Ka hming a hria' hmang hian July 3 aṭang khan pakhatna luah tawh a, tun hi a zawna vawi thum pakhatnaa a awmna a ni. Kumina chart tih­chhuah tawhah hla pakhat hmanga pakhatna vawi thum luah thei awm chhun a la ni. TBC Zaithanpuia chu pakhatnaah vawi thum a awm tawh a, mahse hla pahnih hmangin a ni a, 'Nang chauh i ni' hmangin vawi hnih pakhatnaah a awm a, chumi hnuah 'Zawh ka zuam lo' hmangin pakhatna vawi khat a luah leh.

Pangana aṭangin Cindy Lalthanpuii chu pahnihnaah a rawn chho a, a hla 'A mawi ber' tih hi Zoram mipuiin hmana kan sak ṭhup ṭhup ṭhin kha a ni a, he hla hi tunlaiah a rawn hlawhtlinpui leh thei a, a thiam hle. Temii Sailo hla 'I thiam an hril' tih chu parukna aṭangin pathumnaah a rawn chho.

Maruati & Biteii hla 'Krista au thawm' leh Grace Lalchhanhimi hla 'Min hmangaihna hi' te chu top 10 aṭangin an chhuak. TBC Zaithanpuia hla thar 'Min ngaidam rawh' tih chu pariatnaah a rawn lang thar a, Grace Lalchhanhimi chu a hla pakhat chhuak mah se, 'Rawngbawl tura chhandam' hla hmangin top 10-ah a rawn lang zui lehnghal.

Hontrade Ṭhazual Fakna
1 Amtea - Ka hming a hria
2 Cindy Lalthanpuii - A mawi ber
3 Temii Sailo - I thiam an hril
4 Parema Hla - Hmangaihtu Isua
5 Adonai's Choir - Ka van In
6 One In Christ - Chhum zin lohna
7 Hlimhlimi - In enfiah rawh
8 TBC Zaithanpuia - Min ngaidam rawh
9 Judith - Ka lungawi e
10 Grace Lalchhanhimi - Rawngbawl tura chhandam