Feli Fanai Eng nge hlân tura min beisei le?!

Feli Fanai music video thar 'Min hlân la' tih hi John Mawitea leh Mapuii Fanai te phuah a ni a, kum 2015-a an collection album tih­chhuahah pawh khan an telh tawh. Tun ṭumah hian a music an siamṭha nasa hle a, video pawh tunlai tak, nalh taka siam a ni. A music hi contemporary jazz music anga kalpui a ni a, ngaihthlak a nuam dawn tih phat rual a ni lo.

He hla phuahtu, John Mawitea leh Mapuii Fanai te hian music khawvelah chuan Mizote tan hnuhma min hnutchhiah nasa hle. An pahnih hian hla 500 chuang an phuah tawh a, tunlai Zo rimawi khawvela lengzêm hla ṭha ber ber min hluitu an ni a, an ropui hle. Mapuii Fanai bik hian a hla phuahte album-a khungkhawmin album pathum a tichhuak tawh a, John Mawitea nen an inneih hnu hian an nupaa an hla phuah khung­khawmna album hi pathum an tichhuak leh tawh bawk.

John Mawitea chuan, "Kan hla, music video-a siam tawh chin ringawt pawh hi 350 vel lai chu niin ka hria. Music video album-a mi mai bakah zaithiam hrang hrangtena music video an siam tawhte nen hi chuan Pathian zarah a ṭhahnem ve tawh hle a ni," a ti.

Feli Fanai tan tuna a music video hi kumina music video a tihchhuah pahnihna a ni. Hei bakah hian hmachhawp lian tak dang a nei a, tunkar Zirtawpni aṭang hian shooting an ṭan ang. He a hla thar tur hi a nghahhlelhawm hle a, rap scene a awm a, amah Feli Fanai ngei mai a han chham vel te, a lâm lai velte tihlan a nih hmel a, hmuh tichakawmtu a ni.