C. Lalzarmawia album a chhuak hnai

Tunlaia Kristian ṭhalaite sak hlawh hla phuahtu lar, C. Lalzarmawia chuan a hla phuah khungkhawmna album a buatsaih chu a tichhuak dawn hnai ta a, tunkar emaw kar leh emaw hian tihchhuah a tum.

C. Lalzarmawia album tihchhuah tur hi ‘Rimawi ropui ber’ tih a ni a, zaithiam lar tak takte an zai a, live-a record vek a ni bawk nen, a nghahhlelhawmin ngaihthlak a chakawm tawh hle. ‘Rimawi ropui ber’ album-ah hian amah C. Lalzarmawia bakah TBC Zaithanpuia, Andrew, Dadina, Bethsy, Pensy leh Temii te an zai. Musician pawh an ṭha a, Tea, Nelsons, Faktea, Isaaka, Maenga leh Puipuia te an ni.

Tuna mi hi Zarmawia live studio album pahnihna a ni a, a hmaa mi nen danglamna tam tak a awm dawn. Hla thar eng emaw zat a awm ang a, chubakah chuan la sak chhuah tam loh leh mipui mirmir tana hriat la hlawh vak lote a ni dawn. Lungleia Convention Centre-ah live-a record a ni a, hetah hian mipui kal pawh an ṭha hle. Hla 12 lai a awm dawn a, heng zinga hla pasarih chu hla hlui, la sak chhuah tam loh a ni a, a dang panga erawh chu hla thar a ni thung.