Sum lengvak a tlem ; Pakhatna 'The Invitation'-in $mtd 6.8 vel chiah lalut

Kar tawp liam ta khan film ngaihven hluai tur tlangzarh a awm lo bawk a, Box Office lamah pawh sum lengvak a tlem hle. Sum lalut tam ber 'The Invitation' chuan theatre 3,114 aṭangin $6,805,468 chiah a lalut.

'The Invitation' hi supernatural horror film niin Jessica M. Thompson film direct pahnihna a ni. Game of Thrones leh Fast and Furious star Nathalie Emmanuel channa a ni a, Thomas Doherty, Stephanie Corneliussen leh Alana Boden-te nen an chang ho. Bram Stoker 'Dracula' lehkhabu inspire film niin nula pakhat, a nu boral hnua a vawi khatna atana a chhungte tlawh chhuak, a chhungte thuruk rapthlak tak a hai chhuah dan chungchang tarlanna film a ni.

He film chungchangah hian critics lam ngaihdan a inchen loa, review-tu an tlem bawk nen, rating pawh a ṭha viau lo. Rotten Tomatoes lamah mi 33 review aṭangin rating 4.8/10 a hmu.

Film thar dang
Film thar 'Three Thousand Years of Longing' chu pasarihna niin theatre 2,436 aṭangin $2,919,717 a hmu. He dark fantasy film-ah hian Idris Elba leh Tilda Swinton-te chu an chang dun a, $maktaduai 60 lai senga an siam ni mah se sum erawh a lalut ṭha lo hle.

Box Office Mojo chart-ah film 56 tarlan a ni a, chung zingah chuan Breaking (15), Alienoid (26), The Good Boss (33), Highway One (47) leh Private Desert (50)-te chu film thar an ni bawk.