Film franchise hlawhtling zualte chu...

Tun kar tawp liam ta chhung khan 'Jurassic World Dominion' chu sum eng emaw zat ram hrang hrang aṭanga lalut lehin a sum lakluh tawh zawng zawng zat belhkhawm chu $maktaduai 990.5 a tling tawh a, kumin chhunga film sum lalut tam pahnihna niin 'Top Gun: Maverick' chiah a tluk tawh lo.

Deadline lamin a tarlan dan chuan, kar tawp liam taa a sum lakluh nena belhkhawm hian Jurassic franchise film paruk sum lakluh belhkhawm chuan $tluklehdingawn 6 a tling tawh niin a tarlang a, $tld 6 a pelhna zat erawh a tarlang lo. Jurassic franchise hi khawvela film franchise sum lalut tam zual zingah langin 10-na a ni mek.

Film franchise hlawhtling ber chu, hei le!
Tuilet hnua film franchise siam tawh zawng zawng zinga sum lalut tam ber chu Marvel Cinematic Universe a ni a, MCU film hrang hrang sum lakluh tawh zat belhkhawm chu $27,405,221,625 lai zu han tling tawh a! Amaherawhchu MCU hnuaiah hian film chhuak a tam tawh hrim hrim a, film 29 lai a awm tawh. An la siam belh zel bawk nen, franchise hlawhtling ber a nihna hi hun eng emaw chen chu khumtu an awm dawn lo tih a chiang.

MCU dawt chiahah chuan Star Wars franchise a awm a, film 12 awmin a sum lakluh zawng zawng belhkhawm chu $10,316,904,552 a ni a, MCU nen chuan a inthlau rem rem hle.

Top 10-a lang pha lo DCEU
DC Extended Universe chu top 10-ah a lang pha loa, 12-na a ni phak ṭawk. Mahse DCEU-ah hian film 10 chiah a awm thung a ni. Hetihlai hian top 10-a lang phak zingah film 10 tling lo franchise a awm nual a, DCEU hian Avengers film pali sum lakluh zat belhkhawm pawh a lalut tling lo.