Tomlinson-a’n Bieber thutlukna fing lo a ti

One Direction member, Louis Tomlinson chuan tunhnaia Justin Bieber-a’n tour a neih hmabak a cancel chu thu­tlukna fing lo tak nia a ngaih thu a sawi.

Louis Tomlinson hi 92.3 AMP Radio chuan kâwmin hetah hian Justin Bieber-a thutlukna hi fing tawk loa a ngaih thu a sawi. Tomlinson-a hi Justin-a dinhmun angah ding ta se, eng nge thil tih dan ṭha ber nia a rin tih an zawt a, “A chanchin kha ka lo ngaihtuah ve hle a, kei chuan a bul kan ṭan tawh chuan a tawp kan thleng mai turah ka ngai,” a ti.

Fa pakhat nei tawh British mi zaithiam hian, “Fan-te tan ka sawi theih leh tih theih hian tawk chin a nei lo. Fan-te hlutna hi mi ṭhenkhat chuan an theihnghilh fo ṭhin niin ka hria. A tawpah chuan kan hla leh record leitute chu anmahni bawk an ni a, anni avang hian dinhmun sang zawk thleng thei chauh kan ni,” a ti.

Hetihlai hian Justin Bieber-a’n tour a cancel chungchangah zaithiam dang tam tak chuan amah an thlawp hle. John Ma­yer pawhin a thlawp thu a puang chhuak tawh a, Fifth Harmony chuan, “Kan thlawp tlat a, a hlimna kan duhpui,” an ti. Chhungkua aṭanga seilian nih chuan in lam ngaih a nain, lung a leng duh em em niin an sawi a, hetiang hun harsa hi anmahni pawhin an tawk fo niin an sawi.