Ṭawngṭai Bethel Camping Centre ṭanpuina tur ‘Lalpa mi hriat’ album tlangzarh

Tunlaia gospel album ngaihven hlawh ber tih ngam, ‘Lalpa mi hriat’ tih chu nimin chawhnu dar 2 khan Aijal Club-ah tlangzarh a ni ta. He album hi Lalnunpuia Hrahsel hla phuah khungkhawmna a ni a, tunlaia gospel singer lar ber berten an saksak a ni.

‘Lalpa mi hriat’ album tlangzarh inkhawm hi C. Dinthanga, Lelte Weekly editor chuan a kaihruai a, Rev. Dr. Zaihmingthanga’n hunserh a hmang. Music Domain Mizoram president B. Lalsawmzuala chuan album hi thlirlawkin, T. Zakunga, Lai Autonomous District Council-a CEM chuan a tlangzarh a, he album neitu, Lalnunpuia Hrahsel chuan lawmthu sawina hun a hmang.

Lalnunpuia Hrahsel hi ‘Harhna ropui’ tih hla phuahtu kha a ni a, he hla hi ‘Saiip puan sinin’ tih album-a mi a ni. ‘Saiip puan sinin’ tih album hi kum hnih kaltaa a tihchhuah kha a ni a, Lelte Award-ah Album of the Year he album hian a dawng nghe nghe.

‘Lalpa mi hriat’ album-ah hian hla 11 a awm a, heng zinga hla paruk hi Nunpuia phuah a ni a, a dang panga chu sap hla a lehlin a ni. Album-a hlate hi C. Vanlalmalsawma, RC Lalruatdika, Makima, Ruth CVL Muanpuii, Temi Sailo, Mawitei, Sangtei Renza, Pensy, Amama leh Hriat-hriati ten an sa. Album aṭanga sum hmuh zawng zawngte hi Ṭawngṭai Bethel Camping Centre, Chawnpui ṭanpuina atana hman tur a ni.