Lana Del Rey album ‘Lust for life’ a hralh hnem

Billboard chart chu technical lama harsatna an tawh avanga an tihchhuah lawk theih loh hnuah nimin khan an tichhuak ta a, Billboard 200 chart bikah chuan Lana Del Rey album thar ‘Lust for life’ an hralh hnem ber.

Lana Del Rey album thar ‘Lust for life’ hi Interscope katlanga tihchhuah a ni a, kar liam ta chhung khan copy 107,000 lai a hralh. Tun hi Lana Del Rey-i’n pakhatna a luah vawi hnihna a ni a, kum 2014 khan a album puitling pangngai pahnihna ‘Ultraviolence’ hmangin pakhatna a lo luah tawh. Chu bakah chuan top 10-a lang thei a album pangana a ni a, Ultraviolence bakah hian Born to Die, Paradise leh Honeymoon hmangtein top 10-ah a lo lang tawh.

Pahnihnaah Tyler, The Creator album ‘Scum Fuck Flower Boy’ rawn langin, kar liam ta chhung khan he album hi copy 106,000 hralh a ni a, Lana Del Rey a khum thei ṭep a ni. Heng a hralh zawng zawng zinga copy 70,000 hi album pangngai a ni a, a bak chu album tlukpui a ni. Meek Mill album ‘Wins and Losses’ chu copy 102,000 lai hralh mah se, pathumna bak a luah pha lo.

Linkin Park album pahnih chu top 10-ah a rawn lang. ‘One more light’ album kha palinaah a rawn lang thar leh a, he album hi kar liam ta chhung khan copy 50,000 lai an hralh. An hlawhtlinna album ‘Hybrid theory’ kha copy 41,000 hralhin pariatnaah a rawn lang bawk.

Billboard 200 top 10

“Lust for Life” - Lana Del Rey (107,000)

“Scum Fuck Flower Boy” - Tyler, the Creator (106,000)

“Wins and Losses” - Meek Mill (102,000)

“One More Light” - Linkin Park (50,000)

“DAMN” - Kendrick Lamar (48,000)

“Descendants 2” Soundtrack - Various Artists (46,000)

“4:44” - Jay-Z (45,000)

“Hybrid Theory” - Linkin Park (41,000)

“Grateful” - DJ Khaled (36,000)

“Golden” - Romeo Santos (36,000)