Detective film tlangzarh dawn
Mizo film-a a chi la tam lo tak mai detective film, Detective Mart chu vawiin hian Chanmari YMA Hall-ah tlangzarh a ni dawn.
Detective Mart hi H. Lalsangzela produce a ni a, director hi Lalruatfela a ni. Nikum aṭanga chan ṭan tawh kha a ni a, Aizawlah chauh ni loin, Shillong, Lengpui leh Mamit-ah te chan a ni. A changtute zingah tunlai zaithiam lar, Zualbawihi a tel a, ani bakah hian May Lalbiaknungi leh Eddie Pachuau te pawh kan hmu dawn. Film khawvela kan hmuh fo tawh, Annie Lalduhawmi, Zodinpuii film leh Khuanu Samsuih II-a mi kha a chang a, Kira film-a kan hmuh, Robinson Sailo te, Thangkura tia kan hriat Lalthlengliana te pawh kan hmu bawk ang.
He film hi naupang, a nu leh pa dik lo taka an tual thihna leh, a thinrimin dikna a duh luatah kawng dik lo lam a panna film a ni. Hmangaihna hmanga inbumna te, sum leh pai hmangaihna avanga mahni zahawmna hloh te, ram phatsan lamte tarlan a ni. Film hi zan dar 7-ah tlangzarh a ni ang a, ticket Rs. 50 leh Rs. 100 mantea siam a ni a, ph. 9612658538 / 8119869204-ah te book theih a ni.