Ziak mi zinga sum lalut hnem ber JK Rowling

Dan Brown te, George RR Martin te, John Green te pawh an awm a, mahse ziak mi zingah hian JK Rowling hi a Harry Potter kal vanglai aiin tunhnaiah a che ṭha zawk. Ziak mi zingah khawvela sum lalut hnem ber a ni.

Forbes-in ziak mi zinga sum lalut hnem a tarlanah JK Rowling hi a vawi khat nan pakhatnaah a rawn awm. A lehkhabu ziak, Harry Potter film-a an siam tawh loh hnua ziak mi sum lalut hnema pakhatna a rawn luah hi a mak ang reng zawk hle a, chutihrual chuan a lehkhabu hi hralh a kal reng hlawm tih erawh a lang reng mai.

JK Rowling hian thla 12 kalta chhung khan a lehkhabu ziakte kha US-ah maktaduai 30 zet a hralh a, a lehkhabu ziak, film-a an siam avanga hlawkna a hmuhte nen, thla 12 kalta chhung khan USD mtd 95 zet a hlawh chhuak. JK Rowling hi a hausa tawh reng reng. Forbes-in a tarlan dan chuan a hausakna hi USD mtd 650 zet a tling tawh a, Harry Potter film an siam ho zawng zawng khan USD tld 7.7 zet a lalut tawh a, heng aṭanga hlawkna a chan ve pawh hi a turu tham ngawt ang. A lehkhabu ziak tawh ho hrim hrim hi khawvel pumah copy maktaduai 450 vel an hralh tawh. Ṭanpuina atan sum pe hnem viau lo phei se chuan a hausakna hi tun aia nasa fea sang tur a ni; nikum khan ṭanpuina atan USD mtd 150 zet a pe chhuak.

Ziak mi zinga sum lalut hnem ber pahnihna chu James Patterson a ni. Thriller lam lehkhabu ziaktu lar hian thla 12 chhung khan USD mtd 87 zet a lalut. Alex Cross, Michael Bennett, Women’s Murder Club, Maximum Ride, Daniel X, NYPD Red, Witch and Wizard, Private series te ziaktu hi a inziak lian ve chiang hle a, a lehkhabu ziak tawh ho hi khawvel pumah copy maktaduai 300 chuang zet a hralh tawh.

Diary of a Wimpy Kid aṭang ringawt pawh hian he lehkhabu ziak Jeff Kinney hi ziaktu hlawhtling a ni tih loh theih a ni lo. Sum lalut hnem pathumna a ni a, kum khat chhungin USD mtd 21 a lalut. Da Vinci Code ringawt pawh khawvelin a buaipui a, ama tan pawh hausak loh ngaihna a awm lo. He lehkhabu ziaktu, Dan Brown hi ziak mi sum lalut hnem palina a ni a, USD mtd 20 zet thla 12 chhung­in a lalut. A lehkhabu chhuak leh tur Origin pawh hian ngaihven a hlawh tawh hle. Stephen King chuan USD mtd 15 lalutin sum lalut hnem pangana a ni a, a lehkhabu ziak behchhana film siam ‘It’ chu September hian tihchhuah a ni ang.

Ziak mi sum lalut hnem zingah hian USD mtd 14 laluttu John Griham leh Nora Roberts te, The Girl on the Train lehkhabu, film-a an siam bawk ziaktu Paula Hawkins, USD mtd 13 laluttu te, Fifty Shades of Grey ziaktu EL James, USD mtd 11.5 laluttu te, USD mtd 11 lalut thei Danielle Steel leh Rick Riordan te an lang.