Global chart lamah Blackpink an che ṭha; Hot 100 lamah erawh Harry Styles bawk

Billboard Global chart pahnihah Blackpink chuan an hla thar 'Pink Venom' hmangin ro an rel.

Billboard Global 200 leh Billboard Global Excl. US-ah Blackpink 'Pink Venom' hi pakhatna a ni ve ve. Billboard lamin an tarlan dan chuan September 2020-a he chart an siam hnua khawvel puma 'weekly streaming' tam ber dawttu chu 'Pink Venom' hi a ni hial! Blackpink hian a hmain Global chart lamah hian 'Lovesick Girls' kha pahnihna an lo nihpui tawh a, pakhatna ni thei hla erawh an la nei ngai lo. 'Pink Venom' hmang hian mellung pawimawh tak an rawn phum ta a ni. Heng Global chart pahnih hi ram hrang hrang 200 chuanga streaming leh song sales an enfiah hmanga an chart siam a ni.

August 19-25 inkar khan 'Pink Venom' hi vawi maktaduai 212.1 stream a ni a, dowload-a hralh 36,000 awm bawkin South Korean act zinga Billboard Global 200 No.1 ni thei hmasa ber an ni bawk. Hot 100 chart lamah erawh 22-na a ni pha chauh thung.

Harry Styles-in 'As It Was' US-ah a la larpui zel

Harry Styles 'As It Was' chu Billboard Hot 100 chart-ah pakhatna a ni leh a, kar 21 chhung he chart-ah hian cham tawhin vawi 11 lai pakhatna a ni tawh.

Kum 2020-a Roddy Ricch 'The Box' hnua Hot 100 chart topper ni zing ber a ni leh tawh a, 'The Box' kha kar 11 tho pakhatna a ni ve bawk. Hetihlai hian Lil Nas X 'Old Town Road' erawh a la pha lo hle a, 'Old Town Road' khan kar 19 lai chart-ah ro a rel a ni.

Lizzo 'About Damn Time' chu pahnihna ni ve thungin Steve Lacy 'Bad Habit' chu pathumna a ni bawk.

Bad Bunny = Encanto
Bad Bunny 'Un Verano Sin Ti' bawk Billboard 200 chart-ah pakhatna a ni leh a, kumin chhunga Billboard 200 chart topper nih tam lamah Encanto a tluk chiah. Vawi kua ve ve (a zawn ni loin) chart-ah pakhatna an ni tawh.

Kar hmasa lama pakhatna Rod Wave 'Beautiful Mind' chu pahnihna a ni thung a, Beyonce album thar ber 'Renaissance' chu pathumna a ni ve leh bawk a ni.