Marina-i'n Lai hla tichhuak dawn

Mizo Idol star Marina Vanhriatpuii chuan hla thar a tichhuak dawn a, tun ṭuma a music video thar tur hi chu Lai hla a ni dawn thung - a hla hi 'Thal Caan Lilen' tih a ni.

He hla phuahtu hi C.Z Thanliana a ni a, music video hi Mawitea Hauchhum (RDS SHOTS) kutchhuak a ni. Mawitea hi videography lamah chuan tawn hriat nei ṭha ber zinga mi a ni a, a kut chhuak hian belhchian a dawl ṭhin hle. Sound recording hi EME Recording kut chhuak a ni thung.

Marina-i hian Lengzem hla a sa tam ṭhin a, tun hnuah erawh Mizo folk song lam a hrut nasa hle. 'All In' album a tihchhuah hnuah nasa takin a rawn invawrh leh a, a hla pakhat 'Thlawitenali' phei chu a hit rem rem hle. He hla hi MDM YouTube channel-ah upload niin, mi maktaduai li chuang zetin an en tawh a ni. 'Thlawitenali' music video pawh hi RDS SHOTS kut chhuak bawk a ni.

A hla thar tur 'Thal Caan Lilen' pawh hi Lai hla ni mah se ngaihthlak a chakawm tawh a, September 2, Zirtawp zanah Zonet-ah tihchhuah a ni ang. Video hmuh a nuam leh dawn bawk a, Lalnunfela, Jenny Lalnunthari, Felixa leh Vanlalmuanpuiite'n an thiam thil an show dawn a ni.