Lirtheia thlen theih sang ber 'Umling La'-ah Mizo tlangval Msa Ralte

Mizo tlangval Malsawmdawngzela (Msa Ralte) s/o Lalringa, Tuikhuahtlang chuan khawvela lirthei hmanga thlen theih sang ber hmun (Top of the Highest Motorable Road in the World) Umling La, Ladakh chu 'solo ride' in a thleng.

Msa Ralte hi August 15, 2022 khan Umling La pan tur hian a chhuak a, km 4830 lai a tlan hnuah Thawhlehni chawhma dar 11:05 khan a tum ram chu a thleng ta a ni.

Umling La hi ft. 19024-a sang niin hriat theih chinah Mizoram aṭanga mahni chauha bike-a inkhalh thleng hmasa ber a ni. He hmun hi Ladakh-a awm niin 'mountain pass' a ni a, tunhma chuan lirtheia thlen theih hmun sang ber dawttu nia hriat ṭhin ni mah se kum 2017-a Chisumle leh Demchok khaw inkar kawng siam a nih hnu khan Border Roads Organization (BRO) chuan he kawng hi a siam zo a, 'World's Highest Motorable Road and Pass'-ah an puang zui a ni.

Msa Ralte chuan nimin khan Aizawl pan tura a lo chhuah leh tawh thu Vanglaini a hrilh a, "Ni 10 vel tal chu hun ka rawn hman leh ka ring," tia sawiin, "Machlezz MC-te support-na ka dawn te, kan bialtu MLA Chhuanthanga puihna a dawn avangte bakah Lawma Enfield leh staff zawng zawngte chungah lawmthu ka sawi a ni," a ti.