Despacito YouTube-a video entu ngah ber a ni ta

Spanish hla hit, Luis Fonsi leh Daddy Yankee te hla ‘Despacito’ chu tunlai khawvela music video hit ber a nihzia phat rual a ni ta lo. He music video an tihchhuah aṭanga thla sarih hnu lekah YouTube-a video entu ngah ber a ni ta.

Justin Bieber-a tela remix a nih leh hnu hian nasa lehzualin ‘Despacito’ hi a kâng a, Billboard Hot 100-ah pawh chawlhkar 12 chhung zet pakhatna a luah. Hei mai bakah June thla khan khawvela hla stream nasat ber nihna a luah der tawh a, vawi tluklehdingawn 4.6 zet mai stream a ni tawh.

YouTube bikah hian a hmaa record siamtu Wiz Khalifa leh Charlie Puth te hla ‘See you again’ chu Despacito hian a rawn khum ta. ‘See you again’ hla hi YouTube-ah vawi tluklehdingawn 3 zet en a ni tawh a, hei hi Despacito hian a rawn khum leh ta. YouTube-ah hian, Luis Fonsi - Despacito ft. Daddy Yankee hi vawi tluklehding­awn 3.035 zet en a ni tawh a, Wiz Khalifa - See You Again ft. Charlie Puth hi vawi tluklehdingawn 3 en a ni tawh. ‘Gangnam style’ bik hi vawi tluklehdingawn 2.921 zet en a ni tawh bawk.

Daddy Yankee a lawm hle a, “He platform [YouTube] in huhang a neihzia hi ka hria a ni. Music industry hi a inthlak tawh a, music rule pawh a dang­lam ta. YouTube hian mawhphurhna lian tak a nei a, chu chu ka pawm a ni,” a ti. Despacito hian thla hlui mai khan Psy-a Gangnam Style kha a rawn khum a, thla khat dang a kal leh chuan pakhatna a rawn ni ta der mai.