Zaithiam larte thil rin danglam leh mak

Puithuna thil a ni ber ang chu, ṭhenkhat hi chu. Zaithiam lar tak takte hian mi tam takin chaw tak khuka khukpui tlak loha an ngaih tam tak hi an ring tlat mai. Chu mai bakah puithuna danglam tak an nei fo bawk.

Axl Rose hian ‘M’ hawrawp hi a ngaina lo tawp. ‘M’ hi vanduaina thlentuah a ngai tlat a, chuvang chuan vanduaina pumpelh nan hmun hming, a bul ṭanna ‘M’-a inṭan chu a peh hel hram hram ṭhin. Hei bakah hian thil lawm bik deuh a nei a, chu chu kraws (crucifix) hi a ni. A kalna apiangah a lei mai ṭhin niin, a manager hlui Craig Duswalt chuan a sawi.

Megan Foxx hian Loch Ness monster hi a tak taka a awm a ring tlat. Scotland tlangrama dil pakhat, Loch Ness-ah hian hmanlai aṭangin ramsa mak tak awma ngaih a ni ṭhin a, tun thlengin sap pachal pui puite zingah pawh ring an la awm. Megan Foxx hian Loch Ness monster hi a awm a ring. Chu bakah chuan Sapho lasi thawnthua mi tê, hmuihmul buk chhir chher, Leprachauns te pawh hi a tak taka an awm a ring.

Rapper B.o.B. hian khawvel hi a mum tih a la ring thei lo! Twitter-ah te pawh vawi tam tak he thu hi a sawi chhuak tawh. Khawvel hi a mum a ni tih a la ring thei lo a, Twitter-ah pawh khawvel a mum a ni tih han sawi fiah teh u, tiin midang a cho fo.