Netflix Top 10 Movie-ah a inhlangkai der

Charlize Theron channa Nerflix movie 'The Old Guard' chu tlangzarh a nih aṭanga ni 1- pawh a ral hmain Netflix orginal movie zinga en hlawh ber zingah a inhlangkai nghal der.

Hemi chungchang hi director Prince-Bythewood chuan a Instagram-ah tar­langin,"Netflix-in min lo call zo chiah. The Old Guard-in RECORD A BREAK! Kar li chhungin thlirtu 'household' maktaduai 72 chuang an awm hman dawn! A awihawm loh zawk. Hei hi a ropui hle a ni," tiin a ziak. Gina Prince-Bythewood hi mihang hmeichhe director zinga Netflix top 10 film list-a a film lanpui thei awmchhun a nih phah nghe nghe.

Netflix lam pawhin Twitter-ah Charlize Theron-in The Old Guard film-a mi thla a laksak lai video clip tawite tarlangin, The Old Guard chuan record a break thu leh  Charlize Theron blockbuster chu top 10 most popular Netflix film zingah a inhlankai thu bakah Gina Prince-Bythewood chu Black female director zinga hemi list-a a hming chuang hmasa ber a nih thu an tarlang a ni.

Lockdown vangin khawvel hmun tam bera theatre khar a la ni a, hemi avang hian mi tam tak chuan streaming platform lam hi an hawi nasa. Chutiang lai boruak vela Netflix film tlangzarhte chu a 'hit' thei viau. The Old Guard pawh hi starring an ṭhat bakah budget sang movie a ni a, theatre-a kal buai ngai loin in lama en mai theih avang hian entu an tam chak hle. Netflix hian a household ang zawngin an chhut a, chhungkaw khatah member eng emaw zatin a ruala an en theih bawk avangin entu zat ang tak phei chu hei ai hian a tam fe tura ngaih a ni.

The Old Guard comic behchhana film siam The Old Guard hi July 10 khan tlangzarh a ni a, tlangzarh a nih hnu lawk hian critics lam pawhin review an pe ṭha nghal hle a, a bikin Theron-i chetla vel hian fak a hlawh zual hle. Tlangzarh a nih aṭanga kar khat chhung hian Netflix site-a stream hlawh ber a ni nghal bawk.