Chris Cornell biography kar lehah

Soundgarden leh Audioslave vocalist Chris Cornell biography 'Total F*cking Godhead - The Biography Of Chris Cornell' chu karleh Thawhlehni, July 28 hian Post Hill Press-in a tlangzarh dawn.

Total F*cking Godhead-ah hian amah hrechiangtu leh thawhpuitute'n Cornell chungchang an sawi hrang hrang dahkhawm a ni dawn a, Soundgarden-a a tel lai, 1980s post-punk underground aṭanga Pearl Jam, Alice in Chains leh Nirvana-te ruala 90's chhoa an rawn invawrh lar chhoh dante pawh chhiar tur a awm dawn a ni.

Seattle lam mi rock writer Corbin Reiff  chuan Chris Cornell biography hi a buaipui a, December 2018 khan a buaipui ṭan thu hi lo sawi daih tawhin tunah erawh a peihfel ta niin a lang. Chris Cornell hi May 18, 2017 khan Detroit hotel room-ah a inawkhlum a, Thawhṭanni kha a piancham a ni nghe nghe. A thih hnu lawk, a kum 53-na piancham a lo thlen chuan a ṭhian hnai tak Linkin Park vocalist Chester Bennington chu a inawkhlum ve leh a ni.