Mizo Idol ; Zaininah Top 10 zan hnihna Live music nen an zai tawh dawn

Mizo Idol season 7 inelna borual a sang chho zel a, zanin hian top 10-te chuan a zan hnihna atan inelna Dawrpui Multipurpose Centre-ah an nei leh dawn.

Thawhlehni zan khan Top 10-te hi an lo intihsiak tawh a, zanin hian an inel leh dawn a ni. A ṭha rual thlan chhuah an ni tawh bawk a, a thiam pawh an thiam tawh hlawm hle a, zan khatna aṭang ringawt phei kha chuan judge-te lu pawh a hai ve viau a rinawm. Mipui lam pawhin vote an nei zel tawh dawn bawk a, hei hi show chhung zawng an kalpui tawh dawn a ni.

Live music nen an zai tawh dawn
Mizo Idol season hmasa lama musician-te tho kha house band an ni leh dawn a, mahse Bobo Renthlei aiah Ephraim-a kan hmu tawh dawn thung.

Mizoram-a musician kan neih ṭhat ber berte zai remna hnuaiah contestant-te an zai tawh dawn a, an tan pawh a phurawm tawh viau dawn tih a chiang a, show pawh a hlu lehzual sawt dawn a ni. Zanin aṭang chuan Kima, Bruce, Erick, Ephraim leh Lalnunmawia-te hian contestant-te zai an rem sak zel tawh dawn a, live music ngainatute tan pawh thu lawmawm tak a ni ngei ang.

Chumai chu a la ni lo, backup singer tur pawh an ṭha leh dawn. Aengi leh Rosalyn-te'n contestant-te an pui leh dawn bawk. An thiam zia leh experience an neih ṭhat zia sawi nawn a ngai lo, show tihlutute zinga mi an ni dawn tih a chiang.

Darbu lamah top 10 zai lei tur a awm e
Mizo Idol Top 10-te zai, Thawhlehni zana mi kha Darbu music apps lama chhawp chhuah a ni tawh a, hla pakhat Rs 15 lekin a lei theih.

Kan zai ngainat zawng tak Rs. 15 leka lei theih hi a to loa, tin, artist-te kan thlawp theihna kawng ṭha tak a ni bawk. Darbu apps hian an hla hralhna aṭanga 90% lai mai chu zaithiamte hnenah an pe ṭhin a ni. Top 10 chin hi chu contestant-te zai zawng zawng he appliaction-ah hian dah a ni zel tawh dawn.

Chutichuan...
Karleh Thawhlehni zan hian result puan a ni leh dawn a, mi panga lai mai an tla leh dawn. Chumi a nih avang chuan zanin hian contestant-te an fimkhur a ngai zual hle dawn a ni. An zai thiam vek tawh avangin hla thlang fuh leh an aw mil hla thlang thiam, fing thiamte tan kawng a awlsam ngei ang tih a rinawm. Result puan zanah hian result puan hmain show a awm dawn bawk a, mit leh beng a tlai dawn hle bawk.

Zonet Zawlbuk leh Empai-ah show hi a en theih leh dawn a, top 5-a inhlangkaite chuan karleh Zirtawpni zanah leh September 13-ah intihsiakna an hmachhawn leh ang.

Mizo idol musician turte:-
Guitarist : Ephraim Malsawm
Guitarist : Kima
Keyboardist : Lalnunmawia
Bassist : Bruce Pachuau
Drummer : Erick Chenkual