Gisele Bundchen-i'n a pianchamah thing 40,000 phun a duh

Supermodel Gisele Bundchen chuan a kum 40-na piancham pualin thing 40,000 phun a duh.

Gisele Bundchen hian Thawhṭanni khan kum 40 a tling a, hemi pual hian Amazon rainforest-ah thing tam tham tak phun a duh tih Instagram-ah a sawi. A piancham thlen hma lawk khan IG lamah, "In hriat ṭheuh angin July 20 hi ka piancham a ni. Piancham satliah a ni lo! Kum 40 ka tling tur hi awih harsa ka ti! Ka nunah bung thar ka kai niin ka hria a, awmze nei taka a lawmna siam ka duh. Thing 40,000 phun turin thutlukna ka siam. Kum eng emaw zat chu project hrang hrangah thing ka lo phun tawh, chu chu Khuanu hnena thil ka pek ve theih ṭha ber niin ka hria. Kumin hian ka piancham lawmna pual hian kei leh ka chhungte chuan Amazon rainforest, Brazil-ah thing phun turin ruahmanna kan siam. Mahse in hre vek a, tunah chuan a theih rih lo a ni," tiin a sawi.

Thing a phun theih loh vang hian phun loh tawp erawh a tum hauh lo a, a chhungte leh a ṭhian thilpek pe turte chu an thilpek pek tur chu thingah chantir turin a ti a, chutiang hmang chuan remchang hmasa berah Amazon rainforest-ah chuan thing phun ngei a la tum a; midang pawh chutianga ti ve tur chuan a sawm nghal bawk.