Warner Bros' Release Calendar aṭangin Tenet an dah bo
Christopher Nolan-a film thar tur 'Tenet' chu tlangzarh hun vawi li ngawt sawn a nih hnuah Warner Bros. release calendar aṭangin an dah bo.
'Tenet' movie thuneitu lam chuan hripui lengin ziaawm lam a pan theih loh avanga khawvel puma theatre tam zawk khar a la nih avangin tlangzarh hun hi tarlan loh law law an duh ta rih zawk niin a lang. Nolan-a film, tlangzarh hma hauh aṭanga huhang ngah tak hi China leh khawchhak lamah chuan cinema-a en theih turin tlangzarh a nih mai khawthlang lam media ṭhenkhat chuan an ring a, report ṭhenkhat chuan September 11-ah tlangzarh a ni dawn niin an tarlang a, mahse hei pawh hi thu chiang tak a ni lo.
Warner Bros. Pictures Group chairman Toby Emmerich chuan Tenet film hlawhtlinna chu an goal a nih thu sawiin a hima a lan hunah chuan an theatre partner-te pawh thawhpui nghal an inpeih thu a sawi. Tenet hi a bugdet a sang hle a, $maktaduai 200-225 vel lai film siamna atan hian an hmang a, thlawhtheihna tak takte pawh an tipuak hial a ni. Starring pawh an ṭha ṭhe ṭhaw hle a, John David Washington, Robert Pattinson, Elizabeth Debicki leh Dimple Kapadia-te inlanna tur film-ah hian Indopui III-na pumpelhna tur zawngin pawl pakhat Tenet-te chu an thawk dawn a nih hmel. Christopher Nolan hi Batman Dark Knight Trilogy, sci-fi film turu Interstellar leh Dunkirk-te lo direct tawhtu a ni a, hemi vang hian Tenet hi beisei a sang a, a hmuhnawm ngei pawh a rinawm.