Digital Song Sales chart-a record siamtu Despacito

Luis Fonsi leh Daddy Yankee hla, Justin Bieber-a nena an remix leh hla ‘Despacito’ hi Billboard Digital Song Sales chart-ah pakhatna a luah leh a, chawlhkar 14 chhung lai mai pakhatna a luah ta, he chart-a a zawna pakhatna luah rei ber leh awm chhun a ni. He hla hi kar liam ta chhung khan vawi 84,000 download a ni.

Billboard Hot 100 lamah pawh pakhatna a la luah zel a, he chart-a pakhatna luah rei ber ber hla pathumna zinga mi a ni tawh. Despacito hla hi Billboard Hot 100-ah hian a zawnin pakhatnaah vawi 13-a awm ta a, kum 1998-a Brandy & Monica hla ‘The Boy is Mine’ leh, Boyz II Men hla, kum 1992-a mi ‘End of the road’ te a rawn nih rualpui.

Billboard Hot 100-a pakhatna luah rei thei ber chu Mariah Carey leh Boyz II Men hla ‘One sweet day’ kha a ni a, kum 1995-a tihchhuah kha a ni a, a zawnin vawi 16 pakhatnaah a awm. A dawta pakhatna luah ngun dangte chu Mark Ronson ft Bruno Mars ‘Uptown Funk’, Black Eyed Peas hla ‘I Gotta feeling’, Mariah Carey hla ‘We belong together’, Elton John hlate - ‘Candle in the wind’ leh Something about the way you look tonight’, Los Del Rio hla ‘Macarena’, Boyz II Men hla ‘I’ll make love to you’, Whitney Houston hla ‘’I will always love you’ te an ni a, chawlhkar 15 chhung pakhatna an luah.

Sap hla ni si lo, a zawna pakhatna luah rei ber dawttu a ni tawh bawk. Sap hla ni lo, a zawna pakhatna luah rei ber chu Los Del Rio hla ‘Macarena’ kha a ni a, a pha teuh tawh hle a, chawlhkar khat dang Despacito hi pakhatna a nih leh chuan a um pha tawh dawn a ni.