‘Rhinestone Cowboy’ hmanga kan hriat Glen Campbell a thi

Country music khawvelah chuan a hming a dai tawh kher lo ang. ‘Rhinestone Cowboy’ ringawt pawh Mizo tam tak lunglen kaithotu tling hial khawpa country music-a hnuhma ngah leh mi ropui, Glen Campbell chu Thawhlehni khan a thi.

Zaithiam leh TV host hlawhtling, Glen Campbell chu Thawhlehni khan Nashville, Tennessee-ah Alzheimer natna avangin a thi a, a thih hian kum 81 mi a ni. A thih thu hi Glen-a chhungte chuan rawn nem­nghetin, “Hun rei tak huaisen taka Alzheimer natna a tawrh hnuah pasal duhawm, kan pa leh kan pu, zaithiam leh guitarist Glen Campbell chuan min kalsan ta tih thinlung rit tak chungin kan puang e,” an ti. Glen hian a nupui, kum 35 mi Kim leh a fate pariat a kalsan.

Glen-a nupui Kim hi Tyler, Texas-a The Alzheimer’s Alliance of Smith County-a alzheimer natna neite leh an chhungte bula thusawi tur a ni. Glen-a’n alzheimer natna a neih aṭang hian Glen Campbell Memorial Fund dinin, he pawl kaltlang hian alzheimer natna do leh enkawlin Campbell te chhungkua hian sum leh pai leh thâ nen theihtawp an chhuah a ni.

Billstown, Arkansas khuaa kum 1936-a piang Glen Travis Campbell hi music khawvel­ah mai bakah TV khawvela hriat hlawh a ni. ‘Rhinestone Cowboy’ hla chu tun thleng pawha country music khawvela ngaihthlak hlawh berte zinga mi a la ni a, ‘Yesterday when I was young’, ‘I’m not gonna miss you’, ‘Wichita lineman’, ‘Gentle on my mind’ tih leh hla dang tam tak a hlawhtlinpui hle. Kum 1969 aṭanga 1972 June thla thleng khan CBS TV-ah The Glen Campbell Goodtime Hour show a host bawk a, he show hi a hlawhtlinpui lehzual a, a larpui hle. Grammy Awards pawh 10 ngawt a la tawh a, Academy of Country Music Award hi 10 bawk a la tawh.

Kum 2011 khan alzheimer natna a nei tih hmuhchhuah a ni a, hemi hnu hian music pawh a khawih rei thei dawn tawh lo tih inhriain, kum 2012 khan ‘Goodbye tour’ a nei a, a fate pathumin back-up band angin a tour-ah hian an ṭawiawm nghe nghe.

A show hnuhnung ber chu kum 2012 November 30 khan Napa, California-ah a ni. Kum 2012 Feb. 12-a Grammy Awards show-ah ‘Rhinestone cowboy’ hla a sa a, hei hi TV-a tihchhuah show-a a zai hnuhnun ber a ni ta.

Nikum March 8 khan Rolling Stone chanchinbu chuan Glen hi Nashville-a memory care facility-ah enkawl a nih thu te, alzheimer stage hnuhnung ber a nih tawh thute bakah, biak pawh a biak hleih theih loh thute a ziak. Hun rei tak hetianga a nat hnuah a thlarau a thlah ta a ni.