Gorillaz-in nakkumah album thar tichhuak dawn

English virtual band Gorillaz chuan nakkum February thlaah album thar an tichhuak dawn tih an puangzar.

Social media lamah hemi chungchang hi puangzarin an album thar tur chu 'Craker Island' tih a ni dawn a, nakkum February 23-ah tlangzarh an tum tih leh pre-order theih a nih tawh thu an tarlang.

Murdoc Niccals, 2-D, Noodle, leh Russel Hobbs-te album tihchhuah thar tur hi an studio album pariatna tur ni tawhin kum 2020-a an tlangzarh 'Song Machine, Season One: Strange Timez' hnua an album tihchhuah leh hmasak ber tur a ni.

An album thar turah hian Stevie Nicks, Beck, Bad Bunny, and Tame Impala leh Bootie Brown-te chu an thawhpui a, track list pawh tichhuak tawhin hla 10 a awm dawn.

Damon Albarn leh Jamie Hewlett-te'n kum 1998-a an din Gorillaz hian kum 2001 khan an album hmasa ber 'Gorillaz' chu tichhuakin ram hrang hrangah copy maktauduai sarih vel an hralh hial. Album hrim hrim copy maktaduai 26 vel zet hralh tawhin Guinness World Records pawhin "Most Successful Virtual Band"-ah a puang tawh hial a ni. Grammy award mai bakah MTV Video Music Awards, NME Award leh MTV Europe Music Awards-te pawh an dawng tawh a, Brit Awards-ah pawh kum 2018 khan Best British Group award an dawng tawh a ni.

'Cracker Island' track list:
1. Cracker Island [ft. Thundercat]
2. Oil [ft. Stevie Nicks]
3. The Tired Influencer
4. Tarantula
5. Silent Running [ft. Adeleye Omotayo]
6. New Gold [ft. Tame Impala and Bootie Brown]
7. Baby Queen
8. Tormenta [ft. Bad Bunny]
9. Skinny Ape
10. Possession Island [ft. Beck]