DJ zinga hlawh hnem ber Calvin Harris

Kum 2016 June aṭanga kum 2017 July thla chhunga DJ sum thawh chhuah zat Forbes-in a tarlanah Taylor Swift bialpa hlui Calvin Harris bawk chu sum lalut hnem ber a ni leh; Calvin Harris hi a zawnin kum nga chhung sum lalut hnem ber a ni ta.

Calvin Harris hian tun thla 12 chhung khan USD mtd 48.5 lai lalutin DJ zinga sum lalut hnem ber a ni. Nikum lama a sum lakluh zat nena khaikhin chuan kumina a sum lakluh a tlem zawk hle a, mahse khum zo erawh an awm chuang lo. Calvin Harris hian nikum khan USD mtd 63 a lalut a, kumina a lakluh aiin USD mtd 14.5 zetin a lalut tam zawk. A sum lakluhna lian zingah chuan Las Vegas night club-a a show aṭang te, festival hrang hranga a perform-na leh, a hla hit ‘Feels’ te a ni a, he hla hi Katy Perry leh Pharrell Williams te nena an siam a ni.

Sum lalut hnem ber dawttu chu Tiesto a ni a, kum khat chhungin USD mtd 39 a lalut. Tiesto pawh hi kum nga chhung chu a zawnin sum lalut hnem pahnihnaah a awm tawh.

The Chainsmokers te sum lakluh a tam viau. Duo ang zela an chet avangin The Chainsmo­kers sum lakluh pawh hi an pahnih - Alex Pall leh Andrew Taggart te sum hmuh belhkhawm a ni. Thla 12 kalta chhung khan USD mtd 38 an lalut. Music khawvelah an hming a ri zing mawlh mawlh hle a, an hlawh­tlinna langsar pakhat chu Chris Martin nena an siam ‘Something just like this’ leh Halsey nena an hla ‘Closer’ te a ni.

DJ sum lalut hnem ber pawh lo ni tawh David Guetta chu a tlahniam viau tawh a, pasarihna a ni daih a, list-a lang thar chu DJ Marshmello a ni. Sum lalut hnem palina chu USD mtd lalut thei Skrillex a ni a, Steve Aoki chuan USD mtd 29.5, Diplo chuan USD mtd 28.5, David Guetta-a’n USD mtd 25, Marshmello-a’n USD mtd 21, Martin Garrix-a’n USD mtd 19.5, Zedd chuan USD mtd 19 an lalut.