Hailey Baldwin Hmangaihnaa khat thinlung

Model hlawhtling leh lar, chhe lo bawk si, Kristian ṭha bawk si, Hailey Baldwin chuan kar tawp chhunga an kohhranin a buatsaih ZOE Conference-a a tel chu hlawkpui a inti hle a, he conference-a a tel hnu aṭang hian a thinlung chu hmangaihnain a khat niin a sawi.

Kum 20 model, Hailey Baldwin chuan, ni hnih chhung he conference an neihah hian Pathianin amah chu nasa takin a khawih niin a hria a, “Kan ngaihtuahnate anga nung tura koh kan ni lo a, rinnaa nung tura koh kan ni zawk” tiin Twitter-ah pawh a thai ṭial ngei e. “Ni ropui a va ni em! Ka thinlung hi hmangaihnain a khat a, zanin khan Pathian chuan nasa takin min khawih a ni,” tiin Twitter-ah a ziak bawk.

Baldwin hi evangelical Kristian a ni a, “Kohhran aṭanga seilian ka ni a, kohhran mi ni tura enkawl seilen ka ni. Thlarau thil nena inzawmna neih leh, Pathian nena inlaichinna ṭha neih reng hi mi tin tana thil pawimawh ber niin ka hria,” a ti. Hailey pa hi Kristian actor hlawhtling Stephen Baldwin a ni a, a pamite hi actor tho Alec Baldwin te ho an ni.

Hillsong Kohhrana lawi a ni a, Justin Bieber nen pawn an inhre ṭha hle a, Pastor Carl Lentz-a enkawl kohhrana mi an ni. Kendall, Kylie leh Gigi tih velte nen pawn an inkawmngeih hle.