Annabelle-in N. America a hrân khum
North America lamah chuan thlahrang a hrâng nasa deuh a, film dang tan pawn dinchhuah a hlauhawm hial alawm le! Kar tawp chhunga North America-a movie tihchhuah ho zingah Annabelle: Creation chuan sum a lalut hnem ber.
Kum 2014-a tihchhuah Annabelle hlawhtlin avanga a chhunzawmna an siam ‘Annabelle: Creation’ chuan kar tawp chhung khan USD mtd 35 thawk chhuakin, North America-a sum lalut hnem ber a ni. Amaherawhchu a hmasa zawk ‘Annabelle’ erawh kha chu a tluk lo a, kha film khan opening week-ah USD mtd 37.1 a lalut. USD mtd 35 lalutin, a hmasa tluk lo mah se, Annabelle: Creation hi a siamna sensote ngaihtuah chuan a hlawhtling hle tho a, he film hi USD mtd 15 chauh senga an siam a ni.
Dunkirk chu sum lalut hnem pahnihna a ni a, USD mtd 11.4 lai kar tawp ni thum chhung khan a la thawk chhuak thei. Will Arnett, Katherine Heigl leh Maya Rudolph te channa The Nut Job 2 chuan beisei a pha lo a, sum lalut tam lamah pathumna chauh a ni pha. The Nut Job an tihchhuah, kum 2014-a mi khan opening week-ah USD 19 lalutin, US-a sum a thawh chhuah zawng zawng USD mtd 64 a ni a, The Nut Job 2 hian opening week-ah USD mtd 8.9 chauh a lalut thei thung.
Box office movie
“Annabelle: Creation” - $mtd 35
“Dunkirk” - $mtd 11.4
“The Nut Job 2: Nutty by Nature” - $mtd 8.9
“The Dark Tower” - $mtd 7.9
“The Emoji Movie” - $mtd 6.6
“Girls Trip” - $mtd 6.5
“Spider-Man: Homecoming” - $mtd 6.1
“Kidnap” - $mtd 5.2
“The Glass Castle” - $mtd 4.9
“Atomic Blonde” - $mtd 4.6