Despacito English hla ni lo pakhatna ni rei ber

Luis Fonsi, Daddy Yankee leh Justin Bieber-a te sak ‘Despacito’ chu a hlawhtling zel a, Billboard Hot 100-ah pakhatna ni lehin, ‘Macarena’-in record a lo siam tawh chu a rawn nih rual ta.

‘Despacito’ hla hi Billboard Hot 100-ah pakhatna luah lehin, a zawnin pakhatnaah vawi 14 a awm ta a, heti hian Los Del Rio hla hit ‘Macarena’ record a rawn nih rual. English hla ni lo, Billboard Hot 100-a pakhatna luah rei ber ve ve an ni a, chawlhkar 14 chhung pakhatna an luah. ‘Macarena’ hla hi kum 1996-a tihchhuah kha a ni.

Billboard Hot 100 chart hi an siam tirh aṭanga kum 59-na a ni tawh a, hemi chhunga a zawna pakhatna vawi 14 chin chung lam luah thei hi hla pakua chiah a la awm a, chung zingah chuan ‘Despacito’ pawh chhiar tel theih a ni ta. A zawn­a vawi 14 lai pakhatna luah thei hi Billboard 100 chart-a pakhatna luah ngun thei ber dawt­tu an ni a, hla pariat awmin chung zinga pakhat chu Despacito hi a ni. Vawi 14 pakhatna luah thei dang hlate chu “Uptown Funk!,” Mark Ronson feat. Bruno Mars (2015); “I Gotta Feeling,” The Black Eyed Peas (2009), “We Belong Toge­ther,” Mariah Carey (2005), “Candle in the Wind 1997”/”Something About the Way You Look Tonight,” Elton John (1997); “Macarena (Bayside Boys Mix),” Los Del Rio (1996); “I’ll Make Love to You,” Boyz II Men (1994) leh “I Will Always Love You,” Whitney Houston (1992) te a ni.

A pumpuia pakhatna luah ngun ber chu Mariah Carey leh Boyz II Men hla ‘One Sweet Day’ kha a ni a, kum 1995-a tihchhuah a ni a, a zawnin pakhatna hi chawlhkar 16 chhung a luah a, he record hi tuman an la thleng lo.

‘Despacito’ hla hi Streaming Songs chart-ah chawlhkar 14 chhung pakhatna a luah tawh bawk a, kar liam ta chhung khan US-ah vawi maktaduai 49.4 zet stream a ni. Hot Latin Songs chart-ah phei chuan chawlhkar 28 chhung pakhatna a luah tawh.