Tlangkang hmun lian ber hmu chhuak

University of Edinburgh, Britain-a mithiamte chuan tlangkang hrang hrang, hmun khata a awm khawmna hmun lian ber an hmuchhuak tih an sawi a, an hmuhchhuahna hmun hi Antarctica khawmualpuiah a ni.

Mithiamte chuan uluk taka an zirchian hnuah Antarctica-a tlangkang hnu hma an hmuhchhuah tawhna bialah hian tlang kan tawhna hnu dang, a hmaa la hmuhchhuah loh 91 zet an hmuhchhuah belh leh. A hmain helai bialah hian tlang kan tawhna hnu 47 hmuhchhuah a lo ni tawh bawk.

Tlangkang awm khawmna hmun hi Antarctica khawthlang lam, Ross ice shelf aṭanga km 3,500 vela hla a ni. Tlang kanna ṭhenkhat chu metre 100 chauha sangte a nih laiin a ṭhen chu metre 3,850 zeta sangte a ni. Mita hmuh theih maia awm a ni lo a, vur, km 2 vel zeta chhahin a khuh hnuaia awm a ni.

Tlang kanna hnuhma ṭhahnem tak hmuhchhuah belh leh a nih avang hian mithiam tam tak chuan hlauhthawn an nei. Tlang pakhat pawh hi rawn kâng chhuak leh ni se, Antarctica khawmual thlang lam chuan nasa takin a tuar phah ang. Vur a tui ang a, chu chuan sik leh sa leh tuipui chîm chin thlengin nghawng a nei thei dawn a ni.

Mithiamte chuan khawvel a lum zel chuan Antarctica-a tlangkangte hi kâng chhuak awlsam turah an ngai. Khawvel lum zelin vur a titui zel a, Antarctica-a vur a tui a, a lo pan chuan tlangkang irhchhuak tur a delh rihna a tlahniam a, chu chuan awlsam zawkin tlangkang a siam thei niin an ngai.