We The Kingdom-in hla thar tichhuak
American contemporary christian music band, We The Kingdom chuan hla thar 'Don't Tread on Me' an tichhuak.
'Don't Tread on Me' hi Covid-19 hri len hmaa an phuah tawh ni mah se tun hun hi tlangzarh hun tak nia an hriat thu Scott Cash chuan a sawi.
"Tunah hian mipui an thlabar hlein ka hria a, a awm pawh ka ti hle. Tunhmaa kan la hriat ngai lo hmelma khawvelin a hmachhawn mek a ni. Chuvang chuan kan hla thar tihchhuah hi a hun takah kan tichhuak niin ka hria a, ngaithlatute pawhin an hlauhna hnehna hmanruaah an hman theih ka beisei a ni," tiin Scott chuan a sawi bawk.
We The Kingdom band hi an la naupang hle a, nikum hmasa lama indin chauh kha ni mah se Gospel music huangchhuangah chuan an lar chak hle. An hla 'Holy Water' chu Billboard Hot Christian chart-ah No 2 an nihpui thei der tawh a, nikum October khan an EP hmasa ber Live at the Wheelhouse an la tichhuak chauh a, tunah erawh Christian band lar ber zinga mi an ni der tawh.