Mizo Idol Zaninah Top 5 hriat dawn ta

Mizo Idol season 7 Top 10 result zanin hian puan a ni dawn a, mi panga an tla dawn ta.

Zai intihsiakna boruak nei lian tak Mizo Idol hmawr bawk a hnai zel a, zanin hian top 5 hriat a ni tawh dawn. Zanin bikah hi chuan result puan bakah show an nei nghal dawn a, mit leh beng a tlai dawn tih a chiang.

Kumin Mizo Idol contestant-te zai thiam zia kan hre tawh a, pressure hnuaiah pawh ṭha takin an zai thei. Zaninah erawh pressure tel loin, tihsual hlau loin an zai dawn; chu chu a nghakhlelhawm tawh tak zet.

Jeffrey Lallawmsanga, J Lalchhanchhuahi, PC Lalrinsanga, T Lalhmangaihi, C Vanlalroluahtumi, Deborah VL Hmangaihi, Eddie Malsawmtluanga, Vanlalngaihsaka, Lalngaihzuali leh David Lalchawisanga Darlong-te zinga panga kan mangṭha a ngai dawn a, Judge-te'n an duh panga bakah social media lama vote an hmuh ṭhat dan azirin pakhat a tling dawn bawk.

Vawiin chu dar 12 thleng vote a la thlak theih dawn a, chuvang chuan top 5-a la tling tura kan duhte vote hun a la tawp lo e. Zanin dar 8-ah Zonet Zawlbuk leh Empai-ahte Mizo Idol hi a en theih dawn a ni.