Billboard Hot 100-ah record siamtu Drake a lang lo ve tlat!

Canadian zaithiam Drake hian kum 2009-a ‘Best I ever had’ hla hmanga Billboard Hot 100-a a lan hnuah a vawi khat nan he chart-a lang pha hla a nei lo ve ta tlat mai; hei hi ani bikah chuan chanchin thar ropui tak a ni thung lawi si. Kum 2009 aṭang khan Billboard Hot 100 chart-ah hian lan loh lai a nei lo a, tunah a lang lo leh ta chauh a ni!

Billboard Hot 100 chart tih­chhuah thar berah khan Drake-a hla lang pha pakhat mah a awm ta lo. A hma khan a hla ‘Passionfruit’ chu 81-naah a lang a, ‘Signs’ chu 100-naah a lang a, tunkara chart tihchhuah tharah heng hla pahnihte hi top 100 aṭang hian an chhuak ta a ni. Drake-a dawta Billboard Hot 100-a lang rei ber chu Lil Wayne niin chawlhkar 326 chhung a lang a, Rihanna chu chawlhkar 216 chhung langin pathumna a ni.

Billboard Hot 100 chart siam ṭan tirh ata, Drake hi a zawna he chart-a lang rei ber record siamtu a ni a, chawlhkar 431 chhung chu chhum lo chat loin a lang. ‘Best I ever had’ hla kha kum 2009 May 23 aṭang khan Hot 100 chart-ah a lang ṭan a, chuta ṭang chuan Hot 100-a lang thei hla a nei chho char char ta a ni. Drake-a ropuina em em dang chu he chart-a ṭum khata lang thei hla nei hnem ber a ni. May 21, 2016-a chart tihchhuah­ah khan Hot 100-ah hian a hla 20 ngawt mai a lang thei a, chu record chu amah vekin kumin April 8 khan rawn khumin, ṭum khatah a hla 24 a rawn lang leh ṭhawt a ni.

Hei mai bakah hian chawlhkar 51 chhung Hot 100 top 10-ah a lang thei a, zaithiam awm tawh zinga a zawn­a top 10-a lang rei ber pathumna a ni a, amah aia top 10-a a zawna lang reite chu Katy Perry (chawlh­kar 69) leh The Chainsmokers (chawlhkar 61) te an ni.