MTV VMA-a chawimawi tur Zaithiam PINK

‘What about us’ hla a tihchhuah hnu lawkah Pink tana thu lawmawm tak chu MTV Video Music Awards sem hunah chawimawina bik hlan a ni dawn a, a dawn tur hi Michael Jackson Video Vanguard Award a ni.

MTV VMA hi August 27-a sem tur a ni a, hetah hian Pink hi zai tur a ni a, chu bakah chuan Michael Jackson Video Vanguard Award hi hlan a ni dawn a, he chawimawina hi music leh film lama mi hlawhtlingte an hlawhtlinna lawmpuina a ni. Kum 1984 aṭang khan he award hi siam ṭan a ni a, kum 1991 khan Michael Jackson chawimawi nan Michael Jackson hming hi an puttir a ni.

Kumin MTV VMA hi Katy Perry chuan a host dawn a, Kendrick Lamar chu nomination list-a hming lam tam ber a ni. Miley Cyrus, Ed Sheeran, Lorde, Shawn Mendes, Fifth Harmony, The Weeknd leh 30 Second to Mars te chu nod hmu hnem dangte an ni. Pink hi zai tura beisei a nih hian a hla hit pahnih medley tura ngaih a ni. Album pawh a peih hnai viau tawh a, a album ‘Beautiful Trauma’ tihchhuah hun atan October 13 a ruahman.