Bieber-a’n hla thar tichhuak dawn

Justin Bieber chuan concert ṭhulh mah se, music thar tihchhuah erawh a ṭhulh dawn chuang lo. Hla thar a nei leh tawh a hla thar hi tihchhuah thuai a tum. Justin Bieber-a hla thar hi Bloodpop nena an sak dun a ni a, a hla hming pawh hi chiang taka tarlan a la ni lo a, amaherawhchu ‘Friends’ tih a ni dawn nia sawi a ni.

Concert neih tur hmabak ṭhulh a, music thar a neih tur chung­chang sawi a nih vel mek lai hian Justin Bieber hian a thlarau lam nun tuaitharin hun a hmang nasa hle niin tarlan a ni. A thlarau zin kawng a zawh mekah hian a rilru a paukhauh tawk lo niin a inhria a, chuvang chuan a intuaithar mek. Hetianga a hun a hman rih hi a ngai hle niin khawthlang chanchinbu ṭhenkhat chuan an tarlang.

Tunah chuan kum 23 mi a ni tawh a, naupang ang ni lo, puitling anga a eizawnna leh a khawvel a hmachhawn a ngai tawh. Chutiang tur chuan a nun a thunun theih a ngai a, a hriselna lam pawh a ngaihven a ngai. Chutiang zawng zawng a tihhlawhtlin theih nan chuan a concert tour pawh a cancel a ngai niin an tarlang.