Emma Stone Sum lalut hnem ber actress

Forbes chanchinbuin actress sum lalut hnem a tar chhuah tharah ‘La La Land’ changtunu Emma Stone chu sum lalut hnem ber a ni a, kum 2016 July aṭanga kum 2017 June thla chhungin USD mtd 26 zet a lalut. Emma Stone hi nikum kha chuan sum lalut hnem 16-na daih a ni a, kumin hian a rawn invawrh sang hle.

Kum 46 mi, Jennifer Aniston chu sum lalut hnem pahnihna a ni a, USD mtd 25.5 a lalut. Film lam aṭanga a lakluh ai mah chuan sumdawnna kaihhnawih dang aṭanga a lak hi a tam zawk a rinawm. SmartWater te, Emirates Airlines te nen ten an thawkho a, film lam kaihhnawihah chuan a TV show ‘Friends’ hi a sum lakluhna lian a nih a rinawm.

Sum lalut hnem ber ṭhin Jennifer Lawrence chu pathumnaah a awm. A zawna kum hnih zet sum lalut hnem ber a nih hnuah USD mtd 24 lalutin pathumna dinhmun a luah a, nikuma a sum laluh aiin a zat ve deuh thawin sum a lalut tlem ta. nikum khan USD mtd 46 zet a lalut.

Actress sum lalut hnem zinga top 10-ah Melissa McCarthy chuan USD mtd 18 lalutin palina a ni a, Mila Kunis chuan USD mtd 15.5 a lalut a, Emma Watson chu parukna niin USD mtd 14 a lalut. Charlize Theron pawhin USD mtd 14 a lalut a, Cate Blanchett leh Julia Roberts te chuan USD mtd 12 ve ve leh, Amy Adams chuan USD mtd 11.5 te an lalut.