Twitter-ah Obama a lar zel

Charlottesville-a thihna thleng chung­changah US president hlui, Obama-a’n Twitter-a a thu post-te chu Twitter history-a like nasat ber ber an rawn ni ta a, Ariana Grande a rawn khum.

Obama hian Charlottesville-a thihna thleng­ah ‘Vun rawng emaw, chawr chhuahna emaw, sakhuana emaw avanga midang haw sain tumah kan piang lo’ tia a tweet chu Twitter-a like-tu ngah ber a ni ta a, Ariana Grande thu post, Manchester-a bomb puah hnu lawka mi kha a rawn khum ta a ni. Twitter-a thu tweet, like ngah ber ber 10 zingah Obama tweet hi paruk lai a awm.

Kar kalta Inrinni khan Charlottesville-ah hian white supremacist an tih, mingo chungnunna chawi­vawngtuten kawng an zawh a, chi inthliarna dodaltute nen an intibuai a, mi pakhatin a thih phah. He kawngzawh thlithlaitu police chuanna helicopter chesualah mi pahnih an thi bawk. Hengte avang hian chi leh chi ang zawngin boruak a ṭang hle a, hemi chung­changah hian Obama hian Twitter-ah thu hi a post a ni.