IU-i’n a harsatna sawi chhuak

K-Pop khawvela hmeichhe hlawhtling berte zinga mi IU chuan a hun kal tawha harsatna a tawh dan leh, music khawvela hlawhtling tura a zin kawnga harsatna a tawh dante ‘Happy Together 3’-a a inlannaah a sawi chhuak.

IU hian naupang tê a nih aṭangin entertainment khawvel luhchilh a, hlawhtlinna chan tumin a bei ṭan a, amaherawhchu an chhungkua an tlakchhiat avangin a rilrua awm leh a châk tihlawhtling turin kawng a zawh thei lo nghal thuai. An chhungkua an tla chhia a, chuvang chuan an chhungkua pawh an awm khawm thei lo hial. An retheih tak em avangin ani chuan a pi a bêl a, a cousin-te nen studio te tak têah an inêk beng rawih rawih a, privacy pawh a awm thei lo a ti.

Middle school a kal laiin zai hmanga hlawhtlin tak tak tumna rilru a nei tawh a, chumi tihlawhtling tur chuan theihtawp a chhuah zui ta a ni. IU chuan, vawi 20 chuang audition a hmachhawn a, chung zawng zawngah chuan an hnar fai vek tih a sawi. Chu mai bakah agency lemten an dawr a, a neih ang ang an laksak bawk a ti. Heng agency lem ṭhenkhat chuan won maktaduai 3 te an phut a, a theih ang angin a thawk chhuak a, a pe a, inbumna mai a lo ni leh ṭhin niin a sawi. Hlawhchhamna kawng thui tak a zawh a, beidawng loa a kal zel hnuah IU chu hlawhtlingin, K-pop chart hrang hranga pakhatna luah thei, K-pop khawvela hmeichhe hlawhtling berte zinga mi a rawn ni ta a ni.

K-Pop khawvela hmeichhe solo artist hlawhtling IU hming tak hi Lee Ji-eun a ni a, kum 1993-a piang kha a ni. A hlawhtlinna tak tak chu kum 2010-a album a tihchhuah, Real kha a ni. He album-a hla 'Good Day' phei chu a hlawhtling hle a, South Korea-a an chart ngaihhlut, Gaon Digital chart-ah a zawnin chawlhkar nga chhung pakhatna a luah a, Psy-a 'Gangnam style' nen a zawna he chart-a pakhatna luah ngun ber an ni.