Film school-a an duh loh Steven Spielberg

Hlawhchhamna hi beidawnna chu nise Steven Spielberg hi khawvel mi ropuite zingah kan hmu hauh lo ang. Talent leh thiamna nei lo anga kan ngaih tam tak hi kan hriat chian tawk loh vang a lo ni ṭhin, Steven Spielberg pawh hi a tir khan hrechiang se, University of Southern California School of Theatre, Film and Television hian an hnar lo tur.

Jurassic Park aṭang ringawt pawh hian eng ang taka director ropui nge a nih hi sawi chian a ngai hran lo. Hetianga director hlawhtling a nih hma hian a zirna pawh chhunzawm hlei thei loin, a kal tumna university chuan an lo hnar tawh a ni. Film lamah a tui si a, zir a, degree neih ngei pawh a duh. Tichuan film lam zirchiang a, hlawh­tlinna tur hmabak lian tak inchhawp mai emaw a tih chu chan tumin University of Southern California School of Theater, Film and Television-ah kal a tum a, mahse anni ngaih chuan a lo thiam lo a ni, a luh ve an phal lo. ‘C’ grade-a pass chauh a ni reng a!

Juda chhungkua aṭanga seilian a nih avang hian a naupan lai aṭanga hmuhsitna tawk nasa leh tihduhdah a ni ṭhin. Spielberg hian Pathian hnenah pawh a ṭawngṭai nasat phah ṭhin hle tih a sawi a, a nu leh pa aṭanga Juda kulmuk tak an nih avang­in midangin amah an en dan pawh a danglam a, a nun pawhin a hrethiam lo ṭhin. Chutiang boruaka pangngai taka a nun a hman theih nan Pathian puihna a dil nasa ṭhin hle.

University of Southern California School of Theater, Film and Television-ah hian ṭum thum lai mai luh tumin a bei a, mahse Steven Spielberg hi an lo hnar ziah. A hnuah chuan California State University, Long Beach-ah a kal ta a ni. A zir zawh hma hian school a chawlhsan a, mahse film lama luhna remchang a hmu zui nghal. Sidney Sheinberg chuan chhar chhuakin, film a direct-tir ta a, chuta ṭang chuan a rawn hlawhtling ta a ni. Director lama a hlawhtlin hnuah film lama bachelor degree nei tur hian a zir ha leh a, kum 2002 khan a graduate ve ta chauh a ni.