Leonardo lemah Leonardo

Kum zabi 14-na laia Italian lemziak thiam, scientist ni bawk, Leonardo da Vinci kha a chanchin film-a siam tum a ni a, hetah hian ama hming aṭanga hming an phuah chhuah, lemchan thiam Leonardo Dicaprio chu a chang dawn.

Leonardo da Vinci film hi Walter Isaacson-a lehkhabu ‘Leonardo da Vinci’ behchhana siam tur a ni a, he lehkhabu hi October thlaa tihchhuah tur chauh a ni a, Paramount chuan film-a siam phalna pawh a nei thlap tawh. Walter Isaacson hian lehkhabu ngaihnawm deuh deuh a lo ziak nual tawh a, chung zingah chuan Einstein: His Life and Universe te, Benjamin Franklin: An American Life te chu a lar zual an ni.

Leonardo Da Vinci (Leonard-a, Vinci khaw mi tihna) hi mi tam tak chuan lemziak thiam a nihna chauh hi kan hre lar a, lemziah lam a tuipui mai bakah hian science, ma­thematics, paleontology, architecture, sculpting, engineering, literature, anatomy leh stream hrang hrangah hnuhma tam tak a hnut­chhiah. A lemziak zingah Mona Lisa, The Last Supper, Vi­truvian Man te chu Mizoram thleng pawha kan hriat lar an ni. Leonardo DiCaprio hming an phuahna chhan a nuin a pai laiin, a nu hian Italy-a Leonardo da Vinci lemziak an en lai takin DiCaprio hi a nu pum chhungah a lo che a, chuvang chuan Leonardo tih hming an sa ta a ni.