Top 5 result puan zan - Thlirletna

Zonet buatsaih Mizo Idol Season 7 result puanna chu Thawhlehni zan khan Dawrpui Multipurpose Centre-ah neih a ni a, mit leh beng a tlai hle. Mizo Idol show hi a hmun ngeia thlirtuten a ropuizia an hmu thiam lehzual ang.

Result puan zan hi inelna a nih loh avangin zaithiamte eng thawl takin an zai thei a, chu chuan a hmuhnawmna a belhchhah. House band an thiam takzet a, an rimawi tum ri a phui ṭha hle.

Ṭhazual award aṭanga hriat lar backing vocalist Rosyaln leh Aengi te an inlar ṭan a, anni ṭhian dun hian zai mawina an belchhhah a, host Angelina Paul a zei em em bawk. Eddie-a'n Chhuihthangvala thiam taka a sak lai a, a hnung lama Mizoram scenery mawi zeta rawn langte chu in lama awmten an hmuh loh a hmuna awmte chauh an hmuh chu a ni.

Judge pathum Rinzauva, Robin-a leh Vari ten tawnhriat an nei ṭha tawh a, stage sangah an buai tawh lo. Angaihi, Tum Tumi leh Chhantei ten HIV kan ram hmelma tia ṭhalaite nun uluk taka hmanga turin hla hmangin an sawm a, ṭhuthmun aṭanga Vari'n a rawn sakpui dan hmutu chuan judge Vari ni loin Vohbik Vari a hmu zawk ngei ang.

Boruak hlimawm a ral a, a tawpah result puan a ṭul tak avangin boruak a danglam ta daih. David Lalchawisanga Darlong, Deborah VL Hmangaihi, T Vanlalhmangaihi, Lalngaihzuali leh C. Vanlalroluahtumi te an tling a, zaithiam dang panga J. Lalchhanchhuahi, Eddie Malsawmtluanga, Jeffrey Lallawmsanga, PC Lalrinsanga leh Vanlalngaihsaka te a tling zo ta lo.

Tling zo ve ta lote an puitling hle, result hriat nuam lo tak an hriat hnu lawkah puitling takin thu an la sawi thei. Hnahthial nula Chhantei chuan, "Audition aṭang tawhin kei aia zai thiam, kei aia aw chak, aw mawi deuh deuh hi an tlak laia ka tlin hi a tam lutuk a, mak ka tih chang pawh a tam. Khatiang chunga tun thleng top 10 ka thleng thei hi ka lawm lutuk a. Tunah hian, ka na lo. Lalpa'n min dahnaah hian ka lawm tawk," tiin a sawi.

Judge-te pawhin a tlingte leh tling lote inkar zim zia an sawi a, top 5 result puan zan chhimtute chuan an ṭawmpui khawp ang.

Darbu-ah Mizo Idol hlate a lei theih
Mizo Idol hla ngaithla duh tan Music App 'Darbu' hmangin a lei theih. Darbu hi online hmanga hla ngaihthlakna a ni a, android emaw IOS emaw phone hmang tan a hman theih ve ve.

Android phone hmang tan Google Play-ah Darbu zawn mai tur a ni a, chutiang bawkin IOS phone hmang tan Apple App Store-ah Darbu zawn leh mai tur a ni. Mizo Idol hla pakhat hi Rs 15 man chauh a ni a; mahni hla nalh tih zawng kha Darbu kaltlangin lei mai theihin a awm.

Host Angelina : MSL leh MPL aṭanga Mizo mipui hriat ṭan Angelina Paul-i'n top 5 result puan zan hi a kaihruai a, Angelina hian Mizo Idol 'host' pawh a tlin hle.